Mae cynllun pum mlynedd newydd wedi'i lansio i wella cyfleusterau pêl-droed ar Ynys Môn i ddiwallu'r galw cynyddol.

Dywed CBDC ei bod wedi bod yn gweithio gydag awdurdodau lleol a Sefydliad Pêl-droed Cymru i nodi blaenoriaethau lleol ar gyfer cyfleusterau newydd a gwell ar draws y wlad.

Bydd y cynlluniau'n blaenoriaethu caeau glaswellt artiffisial a naturiol 3G, ynghyd â chyfleusterau oddi ar y cae ac ar gyfer pêl-droed hamdden i grwpiau llai.

Mae cynllun lleol Ynys Môn yn nodi safleoedd presennol a safleoedd posibl ar gyfer buddsoddiad wedi'i dargedu gan gynnwys twf pêl-droed menywod a merched, diogelu at y dyfodol drwy waith dylunio sy'n fwy cynaliadwy yn amgylcheddol a gwella profiadau i chwaraewyr, gwirfoddolwyr a chefnogwyr.

Dywedodd Aled Lewis, Cyfarwyddwr Sefydliad Pêl-droed Cymru: "Ynghyd â Chymdeithas Bêl-droed Cymru, rydym yn parhau i ddarparu cyfleusterau o ansawdd uchel i'r cymunedau sydd eu hangen fwyaf."

"Mae gweithio'n agos gydag awdurdodau lleol a chlybiau ar lawr gwlad wedi bod yn hanfodol, ac rydym yn edrych ymlaen at barhau â'r cydweithrediad hwn i ddarparu cyfleusterau a fydd yn cael effaith gadarnhaol yn barhaol."

Mae'r cynlluniau'n ymateb i'r cynnydd sylweddol mewn cyfranogiad ers i Sefydliad Pêl-droed Cymru gael ei sefydlu yn 2022, gan gynnwys:

• cynnydd o 21% yn nifer y chwaraewyr cofrestredig yn gyffredinol
• cynnydd o 47% yn nifer y menywod a'r merched sy'n cymryd rhan
• cynnydd o 36% yn nifer y chwaraewyr ieuenctid
• cynnydd o 114% yn nifer y chwaraewyr ag anabledd

Cafodd y cynlluniau eu llunio drwy broses ymgynghori helaeth a oedd yn cynnwys cynghorau lleol, cymdeithasau ardal, clybiau llawr gwlad a phartneriaid ehangach, gan gynnwys cyrff llywodraethu cenedlaethol eraill a phartneriaethau gweithredol.

Roedd clybiau pêl-droed llawr gwlad yn chwarae rhan ganolog, gyda dros 50% o glybiau ledled Cymru yn rhoi adborth, gan gynrychioli tua 70% o'r holl chwaraewyr cofrestredig.

Bydd cynllun Ynys Môn hefyd yn ceisio blaenoriaethu ardaloedd lle mae'r angen mwyaf yn ogystal â manteisio i'r eithaf ar gyfleoedd cyllido partneriaeth i gyflymu'r ddarpariaeth

Ychwanegodd y Cynghorydd Alun Roberts, sy'n deilio portffolio hamdden Cyngor Môn: "Mae pêl-droed yn chwarae rôl bwysig yn ein cymunedau, ac mae'r cynllun yma'n gosod gweledigaeth glir hirdymor i sicrhau bod ein cyfleusterau yn gallu ymateb i'r galw cynyddol a chefnogi cyfranogiad ar bob lefel."

"Mae'n galonogol dros ben gweld y pwyslais ar gynyddu cyfleoedd i fenywod a merched, gwella hygyrchedd, a chreu cyfleusterau cynaliadwy o ansawdd uchel ar gyfer cenedlaethau'r dyfodol."

"Edrychwn ymlaen at barhau i weithio gyda Sefydliad Pêl-droed Cymru, Cymdeithas Bêl-droed Cymru a phartneriaid lleol i wireddu'r blaenoriaethau hyn er budd ein trigolion."

Mae cynllun lleol Ynys Môn ar gael ar wefan Sefydliad Pêl-droed Cymru.