Mae rhaglen chwaraeon ieuenctid gynhwysol ym Môn wedi cael ei hanrhydeddu â gwobr genedlaethol bwysig.

Roedd Môn Actif ymhlith yr enillwyr yng ngwobrau Ymddiriedolaeth Chwaraeon Ieuenctid yng Nghanolfan Ryngwladol Telford yn gynharach y mis hwn.

Mae'r wobr Building Belonging yn cydnabod sefydliadau sy'n creu amgylchedd gynhwysol lle mae plant ac oedolion ifanc yn teimlo eu bod yn perthyn.

Darparodd y tîm Môn Actif dros 500 awr o weithgareddau gwyliau y llynedd, ochr yn ochr â rhaglen awyr agored sy'n ehangu gan gynnwys beicio mynydd, syrffio, padlfyrddio, canŵio a chyfeiriannu.

Dywedodd Barry Edwards, rheolwr datblygu chwaraeon: "Mae'r wobr hon yn adlewyrchu angerdd, ymrwymiad a chreadigrwydd ein tîm, ein partneriaid a'r cymunedau rydyn ni'n eu gwasanaethu."

"Rydym yn falch o helpu pobl ifanc ledled Ynys Môn i deimlo eu bod yn perthyn - trwy chwaraeon, chwarae a phrofiadau cadarnhaol sy'n gwneud gwahaniaeth gwirioneddol i'w bywydau."

Mae nifer o gynlluniau’n cael eu rhedeg gan Môn Actif sydd wedi’u hanelu’n benodol at bobl ifanc sy’n profi rhwystrau sylweddol mewn bywyd, fel problemau iechyd meddwl, profedigaeth, trawma a cham-drin sylweddau.

Mae mwy na 60 o bobl wedi cael eu cyfeirio at fenter Medrwn ac Actif Môn, sy'n darparu mynediad am ddim i gyfleusterau hamdden am flwyddyn i blant 11-17 oed.

Drwy ei bartneriaeth â Chwaraeon Anabledd Cymru a rhaglen Insport, mae Môn Actif yn cefnogi 17 o glybiau chwaraeon lleol i ddatblygu llwybrau cyfranogiad cynhwysol - gan helpu pobl ifanc i bontio o chwaraeon ysgol i weithgaredd cymunedol.

Cynhelir sesiynau Insport wythnosol ledled yr ynys, ynghyd â buddsoddiad mewn cyfleusterau a rhaglenni i sicrhau cynaliadwyedd hirdymor.

Drwy ei waith partneriaeth, mae disgyblion gan Chanolfan Addysg y Bont yn Llangefni yn cael manteisio'n rheolaidd ar weithgareddau cynhwysol megis nofio, gymnasteg, ffitrwydd a chwarae meddal mewn lleoliadau diogel a chefnogol.

Mae gwersylloedd chwaraeon cynhwysol hefyd yn cynnig mwy o gyfleoedd ac yn gweithio gyda phobl ddylanwadol megis Sabrina Fortune, pencampwr byd a Pharalympaidd.

Ychwanegodd y Cynghorydd Alun Roberts, sy'n deilio portffolio hamdden Cyngor Môn: "Mae'r gydnabyddiaeth genedlaethol hon yn rhywbeth rydym yn falch iawn ohoni ar Ynys Môn."

"Mae gwaith Môn Actif yn dangos sut y gall chwaraeon a gweithgarwch corfforol drawsnewid bywydau, yn enwedig i bobl ifanc sy'n wynebu heriau."

"Mae'r dull yn adlewyrchu ein huchelgeisiau ehangach drwy gynllun y cyngor a chynllun strategol Môn Actif, sef adeiladu cymunedau iachach a mwy cynhwysol a sicrhau bod gan bob person ifanc y cyfle i deimlo'n rhan o'u cymuned ac i lwyddo hyd eithaf eu gallu."