Bydd Gareth yr Orangutan yn ymuno â MônFM i gyflwyno ei raglen ei hun bob prynhawn Sul rhwng 12 a 2 o’r gloch gan gychwyn yr penwythnos hwn.
Mae Gareth yn gymeriad sydd wedi ennill calonnau cynulleidfaoedd ledled Cymru, a bydd o’n dod â’i bersonoliaeth unigryw, digon o hwyl a cherddoriaeth wych i orsaf leol Ynys Môn a Gwynedd.
Wrth sôn am ei raglen newydd, dywedodd Gareth: "Mae pobl wedi dweud erioed bod gen i wyneb i radio! Mae’r cyfle i gael rhaglen fy hun ar MônFM yn un cyffrous, a dw i’n edrych ymlaen i gyflwyno rhywbeth unigryw a gwahanol i unrhyw beth sydd erioed wedi cael ei ddarlledu o’r blaen!”
Ond nid Gareth ydi’r unig dalent ifanc i gadw cwmni i wrandawyr ar brynhawn Sul.
Yn syth ar ei ôl, rhwng 2 a 4 o’r gloch, Fflur Pierce sydd yn cymryd yr awenau. Mae hyn yn golygu y bydd gan MônFM ddau o dalentau ifanc adnybyddus Cymru yn cyflwyno pedair awr o adloniant bob prynhawn Sul.
Newidiadau i'r penwythnos
Mae ’na newidiadau cyffrous ar y ffordd i nosweithiau Sadwrn hefyd. Bydd Cari Hedd yn cadw cwmni i’r gwrandawyr rhwng 5 a 7 o’r gloch, cyn trosglwyddo’r awenau i Rheinallt Davies, fydd ar yr awyr rhwng 7 a 10 o’r gloch.
Bydd Ian yn symud o’i raglen nos Sadwrn i gyflwyno rhaglen frecwast newydd sbon ar fore Sul, rhwng 7 a 10 o’r gloch.
Wrth sôn am y newidiadau, dywedodd Kev Bach, rheolwr rhaglenni MônFM: "Dan ni wrth ein boddau yn croesawu Gareth i deulu MônFM! Mae o’n gymeriad mor adnabyddus, ac mae cael rhywun fel Gareth yn ymuno â ni yn newyddion gwych i’r orsaf ac i’n gwrandawyr."
"Mae cael Gareth a Fflur yn cyflwyno ar brynhawniau Sul yn rhywbeth dan ni’n arbennig o falch ohono. Mae’n bwysig iawn ein bod ni fel gorsaf gymunedol yn rhoi cyfleoedd a llwyfan i dalentau ifanc Cymru ddangos be maen nhw’n gallu ei wneud."
"Mae’r newidiadau i nos Sadwrn, ynghyd â rhaglen frecwast newydd Ian ar fore Sul, yn rhan o’n hymdrechion parhaus i ddatblygu’r orsaf a chynnig amserlen amrywiol, ffres a chyffrous."
