Wrth i Eisteddfod Genedlaethol yr Urdd ym Mona ddod i ben, mae'r cyfri wedi dechrau ar gyfer gŵyl y flwyddyn nesaf yng Nghasnewydd.

Bydd gŵyl ieuenctid fwyaf Ewrop yn ymweld â'r ddinas am y tro cyntaf yn 2027 gyda'r Maes wedi'i leoli ar dir Tŷ Tredegar.

Bydd gŵyl 2028 yn cael ei chynnal yn ardal Caernarfon - gyda'r lleoliad i'w benderfynu - tra bod disgwyl i Eisteddfod 2029 gael ei chynnal yng Ngheredigion yn dilyn cais gan y cyngor sir.

I nodi blwyddyn tan ddechrau Eisteddfod yr Urdd Bro'r Wenynen, mae dros 400 o blant a phobl ifanc o Gwent wedi bod yn rhan o brosiect i greu ‘Cân y Croeso gyda’r ddeuawd rap, Lloyd a Dom James.

Dwyeddod y Cynghorydd Jason Hughes, aelod y cabinet Cyngor Dinas Casnewydd dros y Gymraeg: "Mae Casnewydd yn ddinas Gymreig falch, ac mae defnydd o’r Gymraeg yn tyfu."

"Rydym yn gweld hynny yng ngwaith gwych ein Menter Iaith arbennig yn y gymuned, mewn bandiau Cymraeg sy’n perfformio mewn lleoliadau a gwyliau yng nghanol y ddinas, ac yn nhwf ein cymuned ysgolion cyfrwng Cymraeg."

"Mae hefyd yn wych bod yma yn Ynys Môn i lansio’r cyfri i lawr i Eisteddfod y flwyddyn nesaf. Wrth dyfu i fyny yng Nghaernarfon gyda llawer o deulu ar yr ochr hon i’r Fenai hefyd, mae’n golygu llawer i mi fod Casnewydd yn cymryd yr awenau i adeiladu ar lwyddiant digwyddiad eleni."

"Mae gennyf hefyd atgofion melys o fynychu nifer o wyliau Eisteddfod yr Urdd wrth dyfu i fyny, a chanu mewn corau ysgol ar y llwyfan, a’r hyder a’r balchder a ddaw gyda hynny, felly rwy’n gwybod o brofiad uniongyrchol y bydd pawb sy’n dod i Gasnewydd fis Mai nesaf yn cael amser bendigedig."

Ychwanegodd Elin Maher, cadeirydd y pwyllgor gwaith: "Mae cyffro gwirioneddol eisoes yn dechrau adeiladu ar draws y rhanbarth wrth i ni edrych ymlaen at groesawu Eisteddfod yr Urdd Bro’r Wenynen, Gwent 2027."

"Mae llawer iawn o waith paratoi eisoes ar y gweill, ac mae’n hynod bwysig i ni sicrhau ein bod yn cyrraedd pob cymuned ar draws y rhanbarth, gan roi cyfle i bawb deimlo’n rhan o’r daith tuag at y brifwyl."

"Trwy gydweithio’n agos gydag ysgolion, partneriaid lleol a chymunedau ledled yr ardal, rydym am sicrhau y bydd yr ŵyl yn adlewyrchu amrywiaeth, egni a chreadigrwydd ardal Bro’r Wenynen."

"Bydd yn gyfle arbennig i arddangos popeth sydd gan y rhanbarth i’w gynnig, ac rydym yn edrych ymlaen yn fawr at roi croeso cynnes i blant, pobl ifanc a theuluoedd o bob cwr o Gymru i ddathlu gyda ni ymhen blwyddyn."

Ddydd Llun, cyhoeddodd trefnwyr yr Urdd y byddai gŵyl 2028 yn cael ei chynnal yn ardal Caernarfon - am y tro cyntaf ers 1956.

Ychydig dros flwyddyn yn ôl, cyhoeddodd Cyngor Gwynedd ei fod wedi gwneud cais ffurfiol i wahodd yr Eisteddfod yn ôl i'r sir am yr tro cyntaf ers Y Bala yn 2014, a chafodd hynny ei dderbyn gan swyddogion yr Urdd.

Eleni, cynhaliwyd yr Eisteddfod lai na 30 milltir i ffwrdd ar faes Sioe Môn ym Mona, ger Gwalchmai.

Ddydd Mercher, croesawodd yr Urdd yn ffurfiol gais gan Gyngor Ceredigion i gynnal digwyddiad 2029, a fydd yn nodi canmlwyddiant yr ŵyl.

Yn ôl dogfennau, mae'r cyngor yn barod i wario hyd at £500,000 - ychydig o dan 20% o gyfanswm costau blynyddol Eisteddfod - er mwyn croesawu'r digwyddiad yn ôl am y tro cyntaf ers 2010 yng Nghiliau Aeron.

Mae'r Urdd yn bwriadu cynnal cyfarfod cyhoeddus y mis nesaf i ddechrau paratoadau gyda gwirfoddolwyr lleol.

Meddai Helen Medi, cadeirydd rhanbarth Ceredigion yr Urdd: “Pa le gwell i ddathlu canfed penblwydd yr Eisteddfod nag yng nghwmni'r Cardis! Rydym yn awchu i ddechrau ar y gwaith o gyd-weithio gyda'r holl ran-ddeiliaid er mwyn sicrhau y cyfleodd a'r profiadau gorau i'n plant a'n pobol ifanc."

Dyweddod Bryan Davies, arweinydd Cyngor Ceredgion: "Mae’n achlysur balch iawn i Geredigion gael y cyfle i gynnig cartref i Eisteddfod yr Urdd yn ystod blwyddyn ei chanmlwyddiant, sy'n atgyfnerthu’r gwreiddiau a’r cysylltiadau dwfn sydd gan Ceredigion â'r Urdd."

"Mae’r ŵyl yn chwarae rhan allweddol wrth gefnogi’r Gymraeg, y celfyddydau a chyfleoedd i blant a phobl ifanc, ac edrychwn ymlaen at weithio’n agos gyda’r Urdd a chymunedau lleol i wireddu Eisteddfod gofiadwy yn 2029."