Mae platfform ar gyfer cerddoriaeth fyw Gymraeg yn ehangu gyda lansiad ap newydd.

Cafodd Awni? ei lansio gyntaf fel gwefan ym mis Ionawr 2025 ac roedd yn dwyn gigs Cymraeg a dwyieithog at ei gilydd ar un map rhyngweithiol am y tro cyntaf.

Mae'r wefan eisoes wedi denu dros 35,000 o ymweliadau, 17,000 o ddefnyddwyr, ac yn cael ei defnyddio’n helaeth gan artistiaid, hyrwyddwyr a lleoliadau i hysbysebu gigs sydd i ddod.

Fe wnaeth y prosiect, a sefydlwyd gan y brawd a chwaer Jona a Martha Owen o'r Felinheli, dyfu o'u profiad eu hunain o golli gigs oherwydd bod gwybodaeth wedi'i gwasgaru ar draws y cyfryngau cymdeithasol.

Dywedodd Martha: "Roedden ni o hyd yn clywed pobl yn dweud - 'doeddwn i ddim yn gwybod am y gig yna'."

"Mae’r wefan wedi profi fod galw gwirioneddol am un lle clir i ddod o hyd i ddigwyddiadau Cymraeg. Yr ap yw'r cam nesaf naturiol, gan ei gwneud hi'n haws fyth i bobl ddarganfod gigs a chefnogi eu lleoliadau lleol."

Mae'r ap newydd yn caniatáu i ymwelwyr ddilyn eu hoff artistiaid, gweld pa ddigwyddiadau sy'n boblogaidd yn eu hardal nhw a chael gwybodaeth am gyhoeddiadau newydd a phan fydd tocynnau'n cael eu rhyddhau.

Fis diwethaf, cyhoeddodd Llywodraeth Cymru y bydd lleoliadau cerddoriaeth fyw yn gymwys i gael rhyddhad o 15% ar eu biliau ardrethi y flwyddyn nesaf fel rhan o gynllun ehangach ar gyfer y sector lletygarwch.

Ychwanegodd Ysgrifennydd y Gymraeg, Mark Drakeford: "Mae'r Gymraeg yn perthyn i ni i gyd, a dylai pawb gael y cyfle i'w defnyddio a mwynhau diwylliant Cymraeg. Rwy'n falch o gefnogi ap Awni? sy'n ei gwneud hi'n haws darganfod bywiogrwydd y sîn gerddoriaeth Gymraeg."

Mae'r ap Awni? newydd, a ddatblygwyd gan y cwmni Moilin o Gaerfyrddin, ar gael yn rhad ac am ddim i'w lawrlwytho ar ddyfeisiau iOS ac Android.