Bydd dros £9.2 miliwn yn cael ei wario ar wella cysylltiadau trafnidiaeth lleol ar draws Ynys Môn a Gwynedd.

Yn ôl Llywodraeth Cymru, bydd grantiau o'r Gronfa Trafnidiaeth Ranbarthol yn helpu i ddarparu systemau modern a chynaliadwy i helpu pobl i symud o gwmpas yn haws.

Bydd £1.5 miliwn yn cael ei wario ar ddatblygu llwybr cerdded a beicio gweithredol ym Menllech - lle mae ymgynghoriad cyhoeddus yn cael ei gynnal ar gynlluniau diwygiedig.

Yng Ngwynedd, bydd gwasanaethau bws gwledig fel Sherpa'r Wyddfa yn derbyn ychydig dros £1 miliwn.

Ar draws Cymru, mae bron i £116 miliwn wedi'i ddyrannu i awdurdodau lleol - gyda thua hanner y cyllid yn cael ei wario ar gynlluniau 'teithio llesol'.

Bydd cyllid hefyd yn cael ei wario ar wella mynediad at drafnidiaeth gyhoeddus, diogelwch ffyrdd a gwella pwyntiau gwefru cerbydau trydan.

Mae'r cynllun trafnidiaeth rhanbarthol ar gyfer Gogledd Cymru, a fydd yn rhedeg am y pum mlynedd nesaf, yn cael ei oruchwylio gan cyd-bwyllgor corfforedig (CJC).

Dywedodd yr Ysgrifennydd Trafnidiaeth, Ken Skates: "Mae darparu gwell trafnidiaeth a chysylltu cymunedau i bawb wrth wraidd y buddsoddiad hwn sydd werth £115 miliwn."

"Rydym am ei gwneud hi'n haws i bobl deithio i'r gwaith, i'r ysgol, gofal iechyd ac i weld ffrindiau a theulu, a hefyd adeiladu system drafnidiaeth mwy modern, cynaliadwy ac integredig ledled Cymru er budd cenedlaethau'r dyfodol."

"Mae ein hymrwymiad i ddull un tîm yn seiliedig ar wybodaeth leol a'n hymddiriedaeth yn ein partneriaid; y CJCs, Awdurdodau Lleol, Trafnidiaeth Cymru, a rhanddeiliaid ehangach, er mwyn sicrhau bod yr arian hwn yn creu'r manteision mwyaf."

"Bydd y gwelliannau hyn yn gwneud gwahaniaethau gwirioneddol i deithiau bob dydd - boed hynny'n lwybrau mwy diogel, llwybrau gwell ar gyfer cerdded, olwyno a beicio, neu gysylltiadau aml-ddull mwy dibynadwy."

Ble fydd yr arian yn cael ei wario?

Cerdded, olwyno a beicio

• Ynys Môn
  - annog teithio cynaliadwy: gwelliant Cylchfan Four Crosses ar yr A5025/ B5420: £100,000
  - llwybrau diogel mewn cymunedau/ cludiant cartref i'r ysgol: £100,000
  - teithio llesol Llanfairpwll (Lôn Refail i Lôn Graig): £100,000
  - teithio llesol Malltraeth i Niwbwrch: £85,000
  - teithio llesol Benllech: £1.5 miliwn
  - teithio llesol Gaerwen: £130,000
  - teithio llesol Amlwch (cam 1 a cham 2 ar y B5111): £150,000
  - mân waith teithio llesol a datblygu cynlluniau: £500,000
• Gwynedd
  - cwblhau cyllun Ffordd Penrhos, Bangor: £800,000
  - cwblhau cyllyn Chwilog i Afonwen: £900,000
  - gwaith datblygol pellach ar gynllun Tywyn i Aberdyfi: £200,000
  - cyllid craidd datblygol: £500,000

Trafnidiaeth gyhoeddus

• Ynys Môn
  - integreiddio â gwasanaethau trafnidiaeth gyhoeddus strategol, gwelliannau i seilwaith trafnidiaeth gyhoeddus: £250,000
  - rhwydwaith bysiau a choetsys gwledig rhanbarthol: £50,000
  - teithiau tacsi â chymhorthdal mewn ardaloedd gwledig i lenwi "bylchau" mewn trafnidiaeth gyhoeddus: £50,000
• Gwynedd
  - gweithredu'r rhwydwaith trawsnewid bysiau Gwynedd (gwelliannau i'r seilwaith bysiau): £500,000
  - rhwydwaith bysiau a choetsys gwledig rhanbarthol Gwynedd (gwasanaethau Sherpa'r Wyddfa, G23 a 2 Fflecsi): £1.04 miliwn

Priffyrdd

• Ynys Môn
  - Gwydnwch Safleoedd Lairds Heol Biwmares (B5109) a'r A454 Heol Biwmares: £150,000
  - prosiect gwydnwch ffordd yr A5 (Pentre Berw): £50,000
  - Cyfnewidfa Drafnidiaeth Niwbwrch: £150,000
• Gwynedd
  - gwelliannau trafnidiaeth Llanbedr: £400,000
  - gwelliannau gwydnwch y rhwydwaith trafnidiaeth, gwelliannau lliniaru llifogydd ar yr A499 Heol Penrhos: £200,000
   - prosiect Porth Caernarfon (Porth): £120,000
•  - cynnal a chadw a gwelliannau priffyrdd, Gwynedd (A4085 Waunfawr i Gaeathro): £400,000

Diogelwch ar yr ffyrdd

• Ynys Môn
  - gwelliannau i ddigwyddiadau priffyrdd: £500,000
  - ymyriadau addysgol: £40,000
• Gwynedd
  - gwelliannau capasiti a diogelwch/ gwelliannau mannau cyfyng: safleoedd clystyrau gwrthdrawiadau: £300,000
  - llwybr diogel i'r Ysgol Maenofferen, Blaenau Ffestiniog: £240,000
  - ymyriadau addysgol: £73,800

Cerbydau allyriadau isel lawn

• Ynys Môn - gwefru cerbydau trydan cyhoeddus mewn meysydd parcio cyhoeddus a chydlynu gwybodaeth: £350,000
• Gwynedd - gwella gwefru cerbydau trydan yn gyhoeddus a chydlynu gwybodaeth: £100,000