Mae prosiect ar gyfer cymunedau amrywiol yn Ynys Môn wedi ennill gwobr genedlaethol.

Sefydlwyd Hwb Cymunedol Amrywiol Môn ym mis Ionawr 2025, ac mae'n cynnig lleoliad croesawgar, cefnogol a chynhwysol, gan gynnwys ffoaduriaid a cheiswyr lloches o Affganistan, Wcráin a Syria yn ogystal â chymunedau lleol ehangach.

Mae'r teuluoedd a'r unigolion hyn wedi ffoi gwrthdaro yn eu gwledydd eu hunain, cyn setlo yn Ynys Môn.

Roedd y prosiect yn fuddugol yn y categori ar gyfer cydraddoldeb, cynhywsiant a chydlyniant yng Ngwobrau Mwy Diogel Cymru 2025.

Mae'r hwb yn helpu preswylwyr i gysylltu, i feithrin perthnasau a manteisio ar wasanaethau hollbwysig drwy sesiynau wythnosol a rhaglen o weithgareddau sy'n parhau i ddatblygu.

Dywedodd y Cynghorydd Carwyn Jones, sy'n dal y portffolio ar gyfer tai a diogelwch cymunedol: "Rwy'n falch iawn fod Hwb Cymunedol Amrywiol Môn wedi derbyn cydnabyddiaeth genedlaethol am ei effaith gadarnhaol ar ddiogelwch cymunedol, cynhwysiant a llesiant."

"Mae'r wobr yn adlewyrchu ymrwymiad ein staff, ein partneriaid a'n gwirfoddolwyr, a'r teuluoedd sy'n cymryd rhan bob wythnos. Mae'r hwb yn dwyn ynghyd popeth sy'n dda am Ynys Môn - mae'n groesawgar, cartrefol, cefnogol ac yn dangos beth ellir ei gyflawni wrth i gymunedau ddod ynghyd."

Mae dros 400 o unigolion wedi ymwneud â'r hwb ers ei lansio, ac mae preswylwyr hen a newydd bellach yn cymryd rhan.

Mae'r hwb yn cyflawni rôl ataliol hollbwysig drwy leihau teimladau o fod yn ynysig, gwella cyfleoedd i gael cefnogaeth a chryfhau hyder mewn gwasanaethau cyhoeddus.

Mae cyfraniadau cyson gan Heddlu Gogledd Cymru yn helpu i sicrhau bod pryderon yn cael eu hadrodd yn ddiogel, ac mae partneriaethau megis Cymru Gynnes, Môn CF, a'r Gwasanaeth Cynnal Gofalwyr yn helpu i ymdrin ag elfennau bregus sy'n ymwneud â thai, cyflogaeth, a chyfrifoldebau gofalu.

Drwy gynnal digwyddiadau megis Wythnos y Ffoaduriaid yn swyddfeydd y cyngor sir, mae'r hwb hefyd wedi helpu i gael gwared ar unrhyw ddryswch am wybodaeth anghywir yn ymwneud â chynlluniau i ffoaduriaid neu gynnig lloches, ac wedi meithrin dealltwriaeth rhwng staff, cynghorwyr a theuluoedd sydd wedi setlo ym Môn.

Ychwanegodd Ned Michael, pennaeth gwasanethau tai Cyngor Môn: "Mae'r gydnabyddiaeth genedlaethol yn amlygu'r gwaith arbennig sy'n cael ei wneud drwy Hwb Cymunedol Amrywiol Môn, a'r gwahaniaeth mae'n ei wneud i fywydau pobl."

"Mae hefyd yn adlewyrchu ein hymrwymiad, fel y nodir yng nghynllun y cyngor, i weithio mewn partneriaeth i gefnogi ffoaduriaid sy'n dod i fyw i'r ynys."

"Mae'r hwb yn lleoliad diogel, lle gall pobl ddod i feithrin perthnasau, manteisio ar gefnogaeth a chyfrannu at ein cymunedau. Rydym yn falch o'r hyn sydd wedi'i gyflawni ac rydym yn edrych ymlaen at barhau gyda'r gwaith pwysig hwn."