Mae swyddogion heddlu yng Nghaernarfon wedi cael eu rhyddhau o gyfrannu at farwolaeth dynes yn y ddalfa.

Bu farw Helen Williams yng ngorsaf heddlu Caernarfon ym mis Mai 2024, ar ôl cael ei gadw yn y ddalfa am dros 33 awr.

Ar ddiwedd cwest yr wythnos hwn, daeth y rheithgor i'r casgliad bod ei marwolaeth yn gysylltiedig â chyffuriau.

Mae ymchwiliad gan Swyddfa Annibynnol Ymddygiad yr Heddlu (IOPC) wedi canfod bod swyddogion wedi gweithredu yn unol â pholisïau a gweithdrefnau.

Cafodd Ms Williams ei harestio am 10.20 fore Gwener 23 Mai 2024 y tu allan i eiddo ym Mangor er mwyn ei dychwelyd i'r carchar.

Aethpwyd â'r dynes 43 oed i'r orsaf yng Nghaernarfon lle'r awdurdodwyd y penderfyniad i'w chadw tua hanner dydd.

Roedd hi yn y ddalfa am tua 33 awr yn aros i ymddangos gerbron y llys. Yn ystod y cyfnod hwn, roedd staff y ddalfa yn arsylwi'n rheolaidd arni, a chafodd ei gweld gan weithwyr gofal iechyd proffesiynol.

Roedd Ms Williams i fod i ddychwelyd i'r carchar yn ystod prynhawn 24 Mai 2024, ond pan gyrhaeddodd y cludiant penderfynwyd nad oedd hi'n ddigon iach i deithio.

Tua 4.15yp, wrth aros i gael ei chludo i'r ysbyty, cafodd ei tharo’n ddifrifol wael. Rhoddwyd cymorth cyntaf iddi gan swyddogion a staff yr heddlu, a chyrhaeddodd parafeddygon tua 40 munud yn ddiweddarach, ond bu farw tua 5.19yp.

Yn dilyn atgyfeiriad mandad gan Heddlu Gogledd Cymru, dechreuodd yr IOPC ei ymchwiliad, a archwiliodd lefel y gofal a ddarparwyd i Ms Williams yn ystod yr amser a dreuliodd yn y ddalfa.

Gwelodd yr ymchwilwyr luniau fideo teledu cylch cyfyng a lluniau fideo o gamerâu a oedd yn cael eu gwisgo wrth iddi gael ei harestio a'i chadw yn y ddalfa, yn ogystal â dogfennau perthnasol yr heddlu.

Hefyd, cafwyd datganiadau tystion gan swyddogion a staff a oedd wedi ymwneud â Ms Williams, a gan y parafeddygon a oedd wedi rhoi triniaeth iddi.

Daeth archwiliad post-mortem i'r casgliad bod Ms Williams wedi marw o gymhlethdodau yn ymwneud â chamddefnyddio cyffuriau.

Dywedodd cyfarwyddwr IOPC, Derrick Campbell: "Roedd hwn yn achos trasig. Rwy'n cydymdeimlo â theulu a ffrindiau Ms Williams a phawb sydd wedi cael eu heffeithio gan ei marwolaeth."

"Ar ddiwedd ein hymchwiliad ym mis Mehefin 2025, ni chanfuwyd unrhyw dystiolaeth i ddangos bod yr heddlu wedi cyfrannu mewn unrhyw ffordd at farwolaeth Ms Williams. Nodwyd bod swyddogion wedi gweithredu yn unol â'r polisi a'r gweithdrefnau wrth ei harestio a'i chadw yn y ddalfa."

"Mae'r dystiolaeth yn dangos bod yr ymyriadau meddygol gan swyddogion a staff yr heddlu yn amserol ac yn briodol ond, yn anffodus, nid oedd modd iddynt atal ei marwolaeth."

Nid oes unrhyw sylw wedi dod gan Heddlu Gogledd Cymru ar yr ymchwiliad ar hyn o bryd.