Mae Môn Actif wedi parhau i annog iechyd a llesiant wrth i niferoedd uchel gymryd rhan mewn amrywiaeth o weithgareddau ar yr ynys.

Yn cynnwys gweithgareddau cymunedol ac ymweliadau â chanolfannau hamdden, cofnodwyd dros 300,000 o ymweliadau rhwng Ebrill a Hydref 2025, yn ôl gwasanaeth hamdden Cyngor Môn.

Mae digwyddiadau allweddol yn cynnwys:

• Gwersylloedd chwaraeon gwyliau ysgol, gwersylloedd chwaraeon cymunedol a Diwrnodau Hwyl i'r Teulu – yn cynnwys darparu cannoedd o becynnau bwyd a chefnogi plant ar draws Ynys Môn.
• Asedau newydd yn Llannerchymedd a Parc Lôn Las.
• Prosiectau newydd mewn partneriaeth â Chyngor Tref Caergybi – yn cynnwys  adfer trac beics diolch i £22,000 gan Gogledd Cymru Actif a Chyngor Môn.
• Rhaglen diogelwch dŵr cymunedol a chynllun ysgol Swim Safe.
• Lansiwyd cynllun Sylfaen Sgiliau Arweinyddiaeth gyda phobl ifanc yn derbyn cymhwyster newydd cysylltiedig â chwaraeon.
• Lansiad Cynllun Cefnogi Ieuenctid Medrwn ac Actif Môn.
• Un deg naw o Lysgenhadon Aur Ifanc wedi eu dewis ar Ynys Môn.
• Derbyniodd rhai disgyblion o Ysgol Uwchradd Caergybi y cyfle i gyfarfod Gareth Bale yn ei Wŷl Chwaraeon yng Nghasnewydd. 

Mae cefnogaeth wedi'i dargedu hefyd wedi'i ddarparu i grwpiau sy'n cael eu tangynrychioli, gyda mwy na £35,000 yn cael ei ddosbarthu i brosiectau yn cefnogi merched a genethod mewn chwaraeon; a £40,000 yn cael ei ddosbarthu i glybiau a sefydliadau er mwyn canolbwyntio ar fod yn fwy cynhwysol.

Dyweddod y Cynghorydd Alun Roberts, sy'n dal y portffolio hamdden: "Mae hyrwyddo iechyd, llesiant a chydraddoldeb wrth wraidd gweledigaeth y cyngor ar gyfer Ynys Môn."

"Mae llwyddiant y rhaglenni hyn yn dangos beth y gellir ei gyflawni pan fyddwn yn cydweithio'n agos ag ysgolion, clybiau, partneriaid a chymunedau. Rydym yn falch o'r cynnydd sy'n cael ei wneud a byddwn yn parhau i adeiladu ar y momentwm hwn."

Mae staff y cyngor hefyd wedi elwa o hyfforddiant Iaith Arwyddion Prydeinig gan adlewyrchu ymhellach ymrwymiad y gwasanaeth i ddarpariaeth cynhwysol.

Mae'r gweithgareddau hyn yn dilyn cyfnod prysur i Môn Actif yn Sioe Môn a Gwobrau Chwaraeon Môn Actif 2025.

Mae dosbarthiadau wythnosol yn parhau i gefnogi oedolion hŷn drwy'r cynllun 60+ yn cynnwys sesiynau atal disgyn, ffordd o fyw a dementia.

Mae gwaith partneriaeth yn parhau i fod yn ganolog i waith Môn Actif. Mae nifer o glybiau chwaraeon lleol yn dilyn y llwybr achrediad Insport, a gefnogir gan well cydweithio rhwng sefydliadau rhanbarthol a chenedlaethol sydd â'r nod o ddatblygu cyfleoedd a mynd i'r afael ag anghydraddoldeb wrth gymryd rhan mewn gweithgareddau. 

Mae Môn Actif hefyd yn gweithredu agwedd newydd seiliedig ar le, sydd wedi'i alinio â model Gogledd Cymru Actif. Mae gwaith seiliedig ar le yn canolbwyntio ar lefydd lle mae pobl yn byw a'r rhwystrau y gallent eu hwynebu wrth gael mynediad at weithgareddau corfforol, chwaraeon a symud.

Mae'n annog cydweithio rhwng sefydliadau lleol, gwasanaethau cyhoeddus, busnesau ac aelodau o'r gymuned er mwyn datblygu datrysiadau sy'n adlewyrchu cryfderau a blaenoriaethau lleol. 

Ychwanegodd Barry Edwards, rheolwr datblygu chwaraeon Môn Actif: "Mae ein cynnydd hyd yma yn dangos cryfder gwaith partneriaeth ar Ynys Môn. Drwy gydweithio â'n partneriaid a'n rhanddeiliaid rydym wedi gallu cyrraedd amrywiaeth eang o bobl."

"Mae creu cyfleoedd cyfartal wrth wraidd yr hyn yr ydym yn ei wneud a byddwn yn parhau i ddiddymu rhwystrau er mwyn i bawb gael y cyfle i elwa o weithgareddau chwaraeon, iechyd a llesiant."

Mae'r gwaith hefyd yn cyfrannu'n uniongyrchol at amcan strategol gofal cymdeithasol a llesiant y cyngor, fel y nodir yng Nghynllun y Cyngor 2023-2028.