Cyfarfu swyddogion heddlu'r dyfodol gyda goruchwyliwr i glywed am lwyddiant diweddar yn mynd i'r afael â throseddau trefnedig ym Mangor.

Gwnaed 70 o arestiadau yn ystod tri mis cyntaf o ymgyrch Adnewyddu Bangor, a lansiwyd ym mis Mawrth.

Aeth Uwcharolygydd Arwel Hughes i ymweld â myfyrwyr sy'n astudio ar gyfer Gradd Plismona Broffesiynol ym Mhrifysgol Bangor wrth iddynt gymryd rhan mewn prosiect amlasiantaeth.

Dywedodd: "Mae Adnewyddu Bangor yn dibynnu ar bob aelod o'r gymuned i gefnogi'r prosiect er mwyn adeiladu ar y llwyddiant sydd wedi dechrau ym Mangor."

"Roedd gan y myfyrwyr wnes i eu cyfarfod bersbectif ar y fenter ac roedd ganddynt syniadau am yr hyn yr hoffent ei weld ar y stryd fawr."

"Mi fyddwn ni yn parhau i weithio gyda Phrifysgol Bangor a phartneriaid eraill i fynd i'r afael â materion sy'n wynebu'r gymuned ac i adeiladu ar yr ymdeimlad o ddiogelwch yng nghanol y ddinas."

Meddai Dewi Roberts, arweinydd rhaglen ar gyfer y radd plismona broffesiynol: "Fel cwrs rydym yn cael cefnogaeth werthfawr gan Heddlu Gogledd Cymru fel bod ein gwaith yn yr ystafell ddosbarth yn cael ei chefnogi gan brofiad bywyd go iawn gan siaradwyr gwadd."

"Roedd y wybodaeth gan yr Uwch-arolygydd Arwel Hughes yn ddiddorol ac roedd gallu trafod dibenion y fenter o werth mawr i'r myfyrwyr."

Yn yr achos diweddaraf, cafodd dau o bobl eu harestio yn dilyn cyfres o gyrchoedd cyffuriau yn ardal Bethesda ddydd Gwener diwethaf.

Mae dyn a dynes wedi cael eu rhyddhau ond maent yn parhau i fod dan ymchwiliad ar amheuaeth o droseddau cyffuriau a gwyngalchu arian.

Ac fe gafodd dyn ei arestio ddydd Llun ar amheuaeth o feddu ar gyffuriau Dosbarth A gyda'r bwriad o'u cyflenwi a gwyngalchu arian. Mae ditectifs wedi atafaelu cryn dipyn o arian parod a heroin amheus.