Mae ap sy'n helpu rhieni i ddysgu Cymraeg i'w plant ifanc wedi ennill gwobr genedlaethol fawr.
Roedd OgiOgi yn un o bum enillydd yn y categori Prosiect o Ragoriaeth yng ngwobrau blynyddol Menter Iaith Cymru yn Llanelli nos Iau.
Yn ôl y beirniaid, mae prosiect Menter Môn wedi helpu "i wreiddio’r Gymraeg mewn bywydau bach o'r cychwyn cyntaf".
Dyweddod Annest Rowlands, hwylusydd yr ap: "Mae OgiOgi yn ap ar gyfer rhieni newydd, darpar rieni neu ella nain a taid – unrhyw un sydd efo babi neu blentyn ac awydd dod allan o’r tŷ i gymdeithasu tra’n datblygu sgiliau yn y Gymraeg."
“Mae’n ffordd o gael gwybodaeth mewn un lle am fagu plant, beichiogrwydd, digwyddiadau lleol ac adnoddau Cymraeg. Trwy Ogi Ogi, mae teuluoedd yn derbyn negeseuon cyson am werth y Gymraeg, ac mae’n helpu i wneud y Gymraeg yn rhan naturiol o fywydau pob dydd.”
Mae negeseuon OgiOgi am drosglwyddo iaith ar yr aelwyd yn cael eu datblygu ymhellach trwy ddefnyddio sesiynau yn y gymuned a gwaith hyrwyddo mewn person.
Dywed y beirniaid fod y prosiect yn "dangos ôl cydweithio adeiladol gyda pharterniaid" ac roeddem hefyd yn gweld fod potensial iddo gael ei ddefnyddio ledled Cymru.
Ychwanegodd Angharad Evans o Fenter Môn: "Mi oedd cael y wobr yma yn syrpreis hyfryd ar ôl teithio mor bell, felly diolch yn fawr!"
"Mae OgiOgi yn bodoli ers sawl blwyddyn, partneriaeth go iawn a ddechreuodd o fewn Fforwm Iaith Ynys Môn. Mae o wedi datblygu yn sylweddol ers i Annest fod wrth y llyw."
"Felly diolch o waelod calon iddi hi am yr ymroddiad a’r gwaith caled mae hi wedi ei roi i sicrhau ei fod yn llwyddo.”
Mae gwobrau 'Prosiect o Ragoriaeth' wedi'u hanelu at brosiectau sy'n cael effaith gadarnhaol ar ddefnydd ac agweddau at y Gymraeg.
Y mentrau eraill enillodd wobr oedd Menter Iaith Abertawe, Menter Dinefwr, Menter Iaith Conwy a Menter Iaith Sir Benfro.
Dwyeddod Garmon Rhys, cyfarwyddwr BBC Cymru ac un o'r beirniaid: "Mae wedi bod yn ddiddorol iawn gweld yr holl waith da sy’n digwydd mewn cymunedau ar hyd a lled Cymru."
"Ac er y gallem fod wedi gwobrwyo pob un o’r prosiectau, roeddem fel panel yn gytûn fod y pum prosiect o ragoriaeth ddaeth i’r brig yn haeddu clod arbennig."


Mwy o arian i adnewyddu'r Amgueddfa Lechi
Carcharu dynes am boeri ar swyddog heddlu
Lansio ap newydd i ofalwyr di-dâl
Swyddogion traffig i gario diffibrilwyr
Porthladd Rhydd: gwaith i ddechrau ar uned newydd