Mae gwaith wedi dechrau ar torri gwerth 10 hectar o goed ym Mharc y Bwlch ger Bethesda.

Mae Cyfoeth Naturiol Cymru yn gwneud y gwaith fel rhan o gynllun adnoddau ar gyfer Coedwig Bethesda ac Abergwyngregyn.

Fe’i crëwyd yn 2021 a’i nod yw arallgyfeirio rhywogaethau ac adeiladu coedwig fwy gwydn ar gyfer y dyfodol.

Yn ôl CNC, mae’r gwaith cynaeafu, sy’n digwydd yng nghornel ogledd-orllewinol y goedwig, wedi’i amseru i osgoi cyfnod bridio gwiwerod coch a thymhorau nythu’r rhan fwyaf o adar, gyda gwiriadau’n cael eu gwneud o safbwynt cadwraeth cyn dechrau ar unrhyw waith.

Bydd contractwyr hefyd yn rheoli cyfeiriad y gwaith cwympo i alluogi unrhyw fywyd gwyllt i gilio i goed cyfagos o’r ardal sy’n cael ei thorri.

Bydd rhai o'r coed sy’n cael eu cynaeafu ar gael i'w gwerthu i grwpiau cymunedol lleol.

Dywedodd Kath McNulty, sy'n goruchwylio gweithrediadau coedwigoedd yng Ngogledd Orllewin Cymru: "Bydd y gwaith hwn yn cynnwys coed llarwydd ym Mharc y Bwlch sydd wedi cyrraedd maint da ar gyfer cynaeafu."

"Yn anffodus yng Nghymru, mae coed llarwydd yn agored i glefyd ffwngaidd Phytophthora ramorum sy’n eu lladd, ac mae’n lledu’n gyflym."

"Mae cynaeafu'r coed cyn iddynt gael eu heintio yn helpu i arafu'r lledaeniad. Wrth ailblannu, ni fydd llarwydd yn cael eu defnyddio mwyach."

"Fel rhan o’r gwaith rydym yn cynnal arolygon amgylcheddol i leihau’r effaith ar yr amgylchedd. Hoffem ddiolch i aelodau’r cyhoedd am eu dealltwriaeth yn ystod y gwaith."

Bydd y gwaith yn cael ei gwblhau ym mis Ionawr, ond bydd pren wedi'i dorri, a fydd yn cael ei brosesu i greu cynnyrch parhaol, yn parhau i gael ei symud o'r safle tan ddiwedd mis Ebrill os oes angen.

Bydd y llwybr cludo ar hyd Lôn y Grug, dros y Bwlch i gyfeiriad Rhiwen ac ymlaen i’r A4244.

Bydd y goedwig, gan gynnwys llwybrau cerdded, yn dal i fod ar agor i ymwelwyr gydag arwyddion a chyfarwyddiadau yn eu lle.