Bydd gofod newydd ar gyfer digwyddiadau awyr agored yn cael ei adeiladu ger amgueddfa Storiel ym Mangor,

Yr wythnos hon, cadarnhaodd Llywodraeth Cymru y bydd £654,000 yn mynd tuag at welliannau i'r parth cyhoeddus yng nghanol y ddinas.

Yn ôl Cyngor Gwynedd, bydd yr arian yn cael ei ddefnyddio i drawsnewid y mannau cyhoeddus o amgylch canolfan Storiel, sy'n dathlu ei phen-blwydd yn 10 oed eleni.

Bydd y gwelliannau yn cynnwys ardal eistedd newydd ar ffurf amffitheatr, tirlunio, creu mynediad mwy hygyrch, seddi caffi awyr agored wedi'u huwchraddio a goleuadau newydd i gynnal digwyddiadau drwy gydol y flwyddyn.

Cyhoeddwyd y cyllid yn ystod ymweliad â'r ddinas gan y gweinidog llywodraeth leol Sian Gwenllian ddydd Mawrth.

Dyweddod arweinydd Cyngor Gwynedd, Nia Jeffreys: "Mae hyn yn newyddion gwych i Fangor, i bobl leol ac i ymwelwyr i'r ddinas. Rydym wrth ein bodd o glywed y cyhoeddiad ac yn croesawu'r buddsoddiad o £654,000."

"Roeddem yn falch iawn o groesawu'r Gweinidog i Fangor ac o gael y cyfle i egluro'r cynlluniau cyffroes ar gyfer yr ardal tu allan."

Mae prosiect Cysylltu Storiel yn rhan o gynlluniau ehangach i greu "coridor diwylliannol cryfach" drwy Fangor, gan gysylltu Storiel â chanolfan Pontio, yr eglwys gadeiriol a llyfrgell y ddinas.

Y bwriad yw cwblhau'r gwaith adeiladu erbyn y gwanwyn flwyddyn nesaf.

Mae cefnogaeth wedi'i sicrhau o Gronfa Effaith Balchder Bro Llywodraeth y DU a hefyd o gronfa Ffyniant Gyffredin Llywodraeth y DU yn ystod y cyfnod dylunio.

Ychwanegood y Cynghorydd Medwyn Hughes, aelod y cabinet dros yr economi: "Rydym wrth ein boddau gyda'r cyhoeddiad, ac roeddem yn falch iawn o groesawu'r Gweinidog i Fangor i siarad efo hi am y cynlluniau cyffrous."

"Mae gan Fangor gyfleusterau rhagorol a bydd prosiect Cysylltu Storiel yn cryfhau'r cysylltiadau rhyngddynt drwy greu gofod awyr agored o ansawdd uchel sy'n cefnogi digwyddiadau, diwylliant a gweithgareddau cymunedol."

"Mae'r buddsoddiad hwn yn gam pwysig arall yn adfywiad canol dinas Bangor ac edrychwn ymlaen at weld y prosiect yn symud yn ei flaen dros y misoedd nesaf."

Daw'r cyhoeddiad yn yr un wythnos y bu Lywodraeth Cymru gyhoeddi sefydlu Tasglu Stryd Fawr newydd i hyrwyddo dyfodol canol trefi.