Mae dyn o Wynedd wedi cael ei garcharu am 17 mlynedd am dreisio dynes yn dreisgar sawl gwaith.

Cafwyd Thomas Cato, heb breswylfa sefydlog, yn euog o'r blaen o bum cyhuddiad o dreisio dros dwy flynedd.

Mae ditectif o Heddlu Gogledd Cymru wedi ei ddisgrifio fel "perygl i fenywod" sydd heb ddangos "dim edifeirwch".

Ymosododd Cato, 37 oed, dro ar ôl tro ar y ddynes a'i threisio ar sawl achlysur dros gyfnod o ddwy flynedd, gan ei gadael wedi dychryn yn lân.

Fe wnaeth ymosod arni trwy ei dyrnu hi yn ei phen gan adael anafiadau gweladwy. Ar un achlysur torrodd ei asennau hi gan ei gadael hi'n methu symud oherwydd y boen.

Ym Llys y Gorn yr Wyddgrug ddydd Iau, cafodd Cato ei garcharu am 15 mlynedd, gyda chyfnod estynedig o ddwy flynedd ar drwydded ar ôl ei ryddhau.

Cafodd hefyd ei wahardd rhag cysylltu â'i ddioddefwr am weddill ei oes, o dan orchymyn atal a bydd hefyd yn gorfod cofrestru fel troseddwr rhywiol am gyfnod penagored.

Dywedodd y Cwnstabl Ditectif Bethany Clarke: "Mae Thomas Cato wedi profi ei hun i fod yn berygl i fenywod drwy beidio â dangos unrhyw edifeirwch, a thrwy orfodi'r fenyw i ail-fyw ei dioddefaint yn ystod treial."

"Mae ei weithredoedd erchyll wedi bod yn ddinistriol, gan ei gadael yn teimlo ar ei phen ei hun ac yn methu ymddiried yn hawdd."

"Mae hi wedi profi trawma na ddylai neb byth orfod ei wynebu, ac mae hi wedi dangos dewrder eithriadol wrth ddod ymlaen."

"Mae hi, heb os, wedi diogelu menywod eraill rhag niwed pellach, a gobeithiaf fod y canlyniad hwn yn cynnig rhywfaint o dawelwch meddwl a chau pennod, wrth iddi barhau â'i hadferiad."

Ychwanegodd: "Mae diogelu menywod a merched rhag trais yn parhau i fod yn flaenoriaeth i Heddlu Gogledd Cymru."

"Hoffwn annog unrhyw un sydd wedi bod yn ddioddefwr trais rhywiol i ddod ymlaen. Byddwn yn gwrando arnoch, yn eich cefnogi, ac yn ymchwilio'n llawn i'r troseddau."