Caergybi: arestio dyn ar amheuaeth o lofruddiaeth

Sunday, 18 October 2026 at 13:08

By Ystafell Newyddion MônFM

Mae'r heddlu wedi cael amser ychwanegol i gwestiynnu dyn ar amheuaeth o lofruddiaeth mewn fflatiau yng Nghaergybi.

Cafwyd hyd i gorff dyn 53 oed gan y gwasanaethau brys yn Llys Watling ar Ffordd Llundain yn oriau mân bore Sadwrn.

Datganwyd bod y dyn lleol wedi marw yn y fan a'r lle gan barameddygon.

Cafodd dyn 33 oed, sydd hefyd yn byw yn yr ardal, ei arestio yn dilyn y darganfyddiad.

Mae ymholiadau o drws i drws wedi bod yn digwydd yn yr ardal, ac mae ditectifs yn apelio ar unrhyw un sydd â gwybodaeth i ddod ymlaen.

Dywedodd y Prif Ditectif Arolygydd Richard Sidney o Heddlu Gogledd Cymru: "Mae'n swyddogion yn parhau yn y cyfeiriad tra bod ein hymholiadau'n parhau."

"Hoffwn ddiolch i'r gymuned leol am eu cydweithrediad tra bod swyddogion yn parhau yn y lleoliad."

Mae'r heddlu hefyd yn annog y cyhoedd i osgoi dyfalu ynghylch y digwyddiad ar y cyfryngau cymdeithasol.

Os oes gennych unrhyw wybodaeth mewn cysylltiad â'r farwolaeth, cysylltwch â Heddlu Gogledd Cymru ar 101 neu drwy'r sgwrs we fyw, gan ddyfynnu‘r rhif cyfeirnod 26000852942.