Cyngor yn cefnogi'r ymgyrch Nid Fy Nghywilydd

Friday, 1 May 2026 16:34

By Ystafell Newyddion MônFM

Mae Cyngor Gwynedd yn cefnogi ymgyrch ryngwladol i annog goroeswyr cam-drin rhywiol plant.

Nod y mudiad 'Nid y Nghywilydd' (Not My Shame) yw annog unigolion, cymunedau a sefydliadau i sefyll mewn undod â'r rheini sydd wedi profi trawma cam-drin rhywiol yn ystod plentyndod.

Sefydlwyd y mudiad a'r elusen yn 2021 gan yr ymgyrchydd a'r goroeswr Emma Jane Taylor.

Meddai: "Bydd pobl ledled Cymru, y DU a'r byd yn dangos eu cefnogaeth mewn sawl ffordd – gan gynnwys gwisgo crysau-t #NotMyShame neu rubanau gwyn, goleuo adeiladau cyhoeddus a chynnal munud o dawelwch."

I nodi diwrnod yr ymgyrch ar ddydd Gwener 1 Mai, mae baner Nid Fy Nghywilydd wedi'i chwifio y tu allan i bencadlys y cyngor yng Nghaernarfon.

Ychwanegodd Dylan Owen, cyfarwyddwr gwasanethau cymdeithasol y cyngor: "Rydym yn falch o nodi'r diwrnod pwysig hwn drwy godi baner Nid Fy Nghywilydd."

"Mae cam-drin rhywiol plant yn dwyn plentyndod oddi wrth lawer o bobl ac yn gallu effeithio ar oroeswyr, yn ogystal â'u teuluoedd, am weddill eu hoes."

"Fel cyngor, rydym yn gweithio'n gyson i wella i weld sut rydym yn cynnig cefnogaeth i unigolion, teuluoedd a chymunedau wrth iddynt ailadeiladu eu bywydau ac ymdopi â trawma."

"Rydym yn ddiolchgar i'r mudiad Not My Shame am godi ymwybyddiaeth ac annog trafodaethau agored a thosturiol ynghylch y mater anodd ond hollbwysig hwn."