Mae cynllun tai solar a redir gan Cyngor Ynys Môn wedi cael ei anrhydeddu â gwobr genedlaethol fawreddog.

Mae systemau ffotofoltäig solar a thechnoleg storio batri wedi'u dylunio a'u gosod yn stoc tai'r awdurdod lleol fel rhan o ymdrechion i wella effeithlonrwydd ynni, torri allyriadau carbon a costau ynni trigolion.

Mae'r fenter, a gyflwynir gan y contractwyr lleol Anglesey Solar & Electrical Ltd, wedi sicrhau gwobr Cyngor Rhanbarthol neu Gorff Awdurdod Lleol y Flwyddyn yng Ngwobrau Effeithlonrwydd Ynni Cymru.

Dywedodd Ned Michael, pennaeth tai y cyngor: "Rydym yn hynod o falch ein bod wedi derbyn y wobr hon. Mae'n cydnabod gwaith caled ac ymrwymiad ein staff a phartneriaid er mwyn gwireddu gwelliannau ystyrlon ar gyfer ein preswylwyr a'n cymunedau."

"Mae'r prosiect yma yn helpu i wella effeithlonrwydd ynni ein stoc dai, lleihau allyriadau carbon a chefnogi tenantiaid trwy leihau'r defnydd o ynni a chostau."

"Mae'n dangos hefyd sut y gall partneriaethau lleol lwyddo i wireddu atebion arloesol a chynaliadwy ar gyfer Ynys Môn."

Yn ôl y cyngor sir, mae mynd i'r afael â newid hinsawdd yn amcan allweddol yn ei gynllun ac mae'r wobr yn adlewyrchu ymrwymiad parhaus i ymateb i'r argyfwng hinsawdd wrth weithio tuag at fod yn sefydliad sero net erbyn 2030..

Dwyeddod y Cynghorydd Carwyn Jones, sy'n dal y portffolio tai: "Mae darparu cartrefi o safon uchel, fforddiadwy a hygyrch yn flaenoriaeth allweddol i'r cyngor, ac mae gwella effeithlonrwydd ynni ein stoc dai yn rhan bwysig o gyflawni'r nod honno."

"Mae'r wobr hon yn cydnabod ymrwymiad y cyngor i fuddsoddi mewn cartrefi sy'n addas ar gyfer y dyfodol – cartrefi sy'n gyfforddus, yn fwy cynaliadwy ac yn fwy fforddiadwy i'n preswylwyr eu cynnal."

"Mae'r gwaith yn cefnogi'r uchelgeisiau a nodir yng Nghynllun y Cyngor ac mae'n dangos yr effaith gadarnhaol y gall buddsoddi mewn tai ei gael ar gymunedau ledled Ynys Môn."

Esboniodd y Cynghorydd Ieuan Williams, sy'n dal y portffolio newid hinsawdd: "Mae mynd i'r afael â newid hinsawdd yn parhau i fod yn un o amcanion strategol allweddol y cyngor ac mae'r wobr hon yn dangos pa mor bwysig yw camau ymarferol er mwyn ein helpu i gyrraedd ein huchelgais i fod yn sefydliad sero net erbyn 2030."

"Mae prosiectau fel yr un yma'n gwneud gwahaniaeth gwirioneddol trwy leihau allyriadau carbon o gartrefi ac adeiladau, yn ogystal â hyrwyddo ynni adnewyddadwy a chynaliadwyedd ledled yr ynys."

"Mae'r gydnabyddiaeth hon yn adlewyrchu penderfyniad y Cyngor i ymateb yn gadarnhaol i'r argyfwng hinsawdd a chreu buddion amgylcheddol ar gyfer cenedlaethau'r dyfodol."

Mae'r Cyngor Môn yn parhau i fuddsoddi mewn prosiectau a chynlluniau sy'n cefnogi gweithredu ar yr hinsawdd, gwella ansawdd tai a helpu i greu cymunedau cynaliadwy ar yr ynys.

Ychwanegodd Anglesey Solar & Electrical Ltd: "Rydym wedi bod yn ddigon ffodus i wasanaethu fel prif gontractwr PMC 483 ers iddo ddechrau ac rydym yn hynod falch bod ei lwyddiant wedi'i gydnabod yn genedlaethol."

"Mae'r prosiect hwn yn adlewyrchu gweledigaeth glir Cyngor Môn i fynd i'r afael â gofynion ynni'r dyfodol yn ystod cyfnod o ansefydlogrwydd ynni ynghyd â gwaith caled ac ymrwymiad pawb sydd wedi ymwneud â'r prosiect."

"Mae ein perthynas waith â Chyngor Sir Ynys Môn yn parhau i esblygu mewn modd gadarnhaol gyda buddion y prosiect a'r tenantiaid a gefnogir wrth wraidd hynny."

"Mae buddion PMC 483 eisoes yn cael profi gan denantiaid ac ni allem fod yn fwy balch o'r rhan yr ydym wedi'i chwarae yn ei lwyddiant."