Cafodd tacsi ei ddwyn o Gaergybi ac roedd yn gyrru ar ochr anghywir yr A55, mae'r heddlu wedi cadarnhau.

Mae dyn yn parhau yn y ddalfa ar ôl i'r cerbyd yr oedd yn ei yrru gael ei stopio wrth deithio ar y gerbytffordd tua'r gorllewin nos Lun.

Cafodd un person ei gludo i'r ysbyty yn dilyn gwrthdrawiad â'r cerbyd a gafodd ei ddwyn ar Ffordd Llundain yng Nghaergybi, lle cafodd nifer o gerbydau wedi'u parcio eu difrodi hefyd.

Cafodd y cerbyd ei ddwyn o gwmni Tacsi Zoe yng Nghaergybi tua 7.30pm.

Mewn datganiad ar y cyfryngau cymdeithasol, dywedodd y perchennog "Dwi wedi cael fy nghlymu i mewn i'r digwyddiad, ac fe fyddai llawer yn cytuno bod y sefyllfa gyfan wedi bod yn un eithriadol o ddychrynllyd a thrawmatig."

"Byddwn i'n hoff o ddweud yn glir nad un o'm gyrwyr i sy'n gyfrifol am hyn. Diolch yn fawr i holl swyddogion yr heddlu am eu hymateb cyflym i'r sefyllfa."

Yn dilyn y gwrthdrawiad yng Nghaergybi, aeth y tacsi ar yr A55 i gyfeiriad y gorwellin, gan deithio i'r cyfeiriad anghywir.

Am tua 7.55yp, daeth swyddogion â'r cerbyd i stop yn ddiogel ar yr A55 rhwng Rhosneigr a Rhostrehewfa ar ôl cau'r ffordd.

Cafodd y dyn ei arestio wedyn ar amheuaeth o sawl trosedd, gan gynnwys dwyn cerbyd modur, gyrru'n beryglus a methu â darparu trwydded. Mae'n parhau i fod yn nalfa'r heddlu ac yn parhau i gael ei holi gan swyddogion.

Yn ôl yr heddlu, mae'r beiciwr yn parhau yn yr ysbyty gydag anafiadau ond nid yw ei fywyd mewn perygl.

Mae ditectifs yn apelio ar dystion i ddod ymlaen ac yn annog y cyhoedd i osgoi dyfalu am y digwyddiad ar y cyfryngau cymdeithasol.

Mae'r heddlu hefyd wedi cydnabod "y teimlad y gallai'r digwyddiad hwn ddenu" yng ngoleuni'r gwrthdrawiad penben, lle bu farw saith o bobl - gan gynnwys dau swyddog heddlu - ar yr A66 ger Middlesbrough fore Sadwrn.

Dyweddod Nick Evans, y Prif Gwnstabl Cynorthwyol Dros Dro o Heddlu Gogledd Cymru: "Rwy'n ddiolchgar iawn am y gefnogaeth rydyn ni wedi'i dderbyn gan y cyhoedd hyd yma ac am y sylwadau cadarnhaol sydd wedi'u gwneud ynglŷn â gweithredoedd ein swyddogion, a ddaeth â'r digwyddiad hwn i ben yn ddiogel."

"Mae'n amlwg i bob un ohonom, yn enwedig yng ngoleuni'r digwyddiadau trasig yn Cleveland, pa mor ddifrifol y gallai'r canlyniadau fod wedi bod. Rwy'n hynod falch o'r dewrder a'r proffesiynoldeb a ddangoswyd gan ein swyddogion wrth ddatrys sefyllfa heriol iawn yn ddiogel."

"Hoffwn annog pobl i beidio â dyfalu am amgylchiadau'r digwyddiad nac unrhyw gymhellion posibl tra bod ein hymchwiliad yn parhau."

"Byddwn yn parhau i ddarparu diweddariadau trwy ein gwefan a'n sianeli cyfryngau cymdeithasol pan fydd yn briodol gwneud hynny."

Os oes gennych unrhyw wybodaeth am y digwyddiad, neu unrhyw luniau camera cerbyd, TCC neu ffôn, cysylltwch â Heddlu Gogledd Cymru ar 101 neu drwy'r sgwrs we fyw, gan ddyfynnu'r rhif cyfeirnod O140476.